Badr Wasti
charaghon men andhera hai andhere men ujale hain
hamare shahr men kaali hava ne par nikale hain
hamen shab kaTne ka fan virasat men mila ham ne
kabhi patthar paka.e hain kabhi sapne ubale hain
dilon men ḳhauf hai us ka nazar hai us ki rahmat par
gunahgaron men shamil hain magar allah vaale hain
laḌe the saath mil kar ham charaghon ke liye lekin
hamare ghar andhere hain tumhare ghar ujale hain
tumhari yaad se achchha nahin hota koi aalam
mayassar jin ko ho jaa.e baḌi taqdir vaale hain
mohabbat aḳhiri hal hai hamare sab masa.il ka
magar ham ne to nafrat ke sanpole dil men paale hain
bhaḌakti aag to do chaar din men bujh ga.i thi ‘badr’
abhi tak shahr ke manzar na jaane kyuun dhuanle hain
Leave a Reply