ye kya vasvase ham-safar ho ga.e hain
sabhi raste pur-ḳhatar ho ga.e hain
pukara nahin tum ko ghairat ne varna
ka.i baar aakar idhar ho ga.e hain
na samjho hamen kuchh shikayat nahin hai
ki ḳhamosh kuchh soch kar ho ga.e hain
kise ho ḳhabar dard-e-pinhan ki ai dil
jinhen thi ḳhabar be-ḳhabar ho ga.e hain
ham apni tabahi pe bas muskura.e
magar daman-e-ghair tar ho ga.e hain
tire bin hamen maut bhi to na aa.i
juda.i ke din bhi basar ho ga.e hain
Leave a Reply