Hasan Naim
lutf-e-aghaz mila lazzat-e-anjam ke ba.ad
hausla dil ka baḌha koshish-e-nakam ke ba.ad
ab ḳhuda jaane tujhe bhi hai ta.alluq ki nahin
log lete hain mira naam tire naam ke ba.ad
mai-kada tha to vahin roz chala jaata tha
ab kahan koi Thikana hai mira shaam ke ba.ad
koi aaya hi nahin ku-e-vafa tak varna
kuchh bhi mushkil nahin ye raah do ik gaam ke ba.ad
ek do ghunT bahut talḳh hai mai ki lekin
lutf aa.ega tujhe shaiḳh do ik jaam ke ba.ad
vaqt kaTta raha kaTti rahin rahen lekin
ham ne muḌ muḌ ke tumhen dekha har ik gaam ke ba.ad
kuchh to saaqi se gila hoga ‘hasan’ ko varna
kaun mai-ḳhane se uThta hai do ik jaam ke ba.ad
Leave a Reply