jab ki sar par vabal aata hai
pech men baal baal aata hai
kab payam-e-visal aata hai
khvab hai jo khayal aata hai
tegh-e-irfan se ruuh bismil hai
haal par apne haal aata hai
shal hai har chand panja-e-mizgan
par kaleja nikal aata hai
kya ajab ishq ho jo piiri men
duudh men bhi ubaal aata hai
khuub chalti hai naav kaghaz ki
ghar men qaazi ke maal aata hai
dher hai dil men ab kudurat ka
mitti lene kalal aata hai
chal nikalti hai kashti-e-aamal
araq-e-infial aata hai
hijr ke din yuun hi guzarte hain
maah jaate hain saal aata hai
tere ankhon ke samne sayyad
zabh hone ghazal aata hai
jis ne us ki gali men phal paaya
kha ke patthar nihal aata hai
sar kata kar shahid hote hain
umr kho kar kamal aata hai
na milega siva muqaddar se
jehl hai ja malal aata hai
bahr-e-zar gul hai palla-e-mizan
til ke kante pe maal aata hai
‘bahr’ ki sun ke arifana ghazal
shah-e-dariya ko haal aata hai
Leave a Reply