Poet
na kabhi koi ḳhat aaya na payam-e-yar aaya
magar ik javab ulTa ki hazar baar aaya
mujhe garche apne dar se vo fareb de ke Talen
ye ḳhushi bhi kam nahin hai ki umid-var aaya
nahin dil pe zor chalta ye yaqin hai sab ko naseh
tujhe kya zaban par apni nahin iḳhtiyar aaya
na ḳhuda ko jante ho na nabi ko mante ho
bas uTho qasam na khaao mujhe e’tibar aaya
tire ghar vo aa.e ‘nazim’ to ye iztirab kya hai
koi badshah aaya koi shahryar aaya
Leave a Reply