Ho Ke Betab Badal Lete The Aksar Karwat

ho ke betab badal lete the aksar karvat

ab ye hai zoaf ki qaabu se hai bahar karvat

hijr se badh ke shab-e-vasl aziyyat hai mujhe

ghair ki yaad dilati hai tiri har karvat

rind bimar raha mohtasib-e-shara se tez

is qadar jald are phenk ke saghar karvat

chutkiyan hijr men leti hai shikan bistar ki

mere pahlu men chubho deti hai nashtar karvat

shokhiyan hain ki bane hijr ki shab vasl ki raat

so rahe pher ke munh aap badal kar karvat

baithna un ka nazakat se daba kar siina

phir ye kahna ki na lena tah-e-khanjar karvat

teri thokar se na ulte kahin vo takhta-e-qabr

le na khvabida koi fitna-e-mahshar karvat

har taraf kante bichhe hain shikan bistar ke

ham ko mushkil hai badalna sar-e-bistar karvat

unhen munh pher ke sone nahin deta huun ‘riyaz’

vasl ki raat mujhe kyuun na ho dubhar karvat

Leave a Comment