Manish Shukla
dil-e-barham ki ḳhatir mudda.a kuchh bhi nahin hota
ajab halat hai ab shikva gila kuchh bhi nahin hota
koi surat ubharti hai na main mismar hota huun
main vo patthar ki jis ka faisla kuchh bhi nahin hota
kisi ko saath le lena kisi ke saath ho lena
faqiron ke liye achchha bura kuchh bhi nahin hota
kabhi chalna mire aage kabhi rahna mire pichhe
rah-e-ulfat men chhoTa ya baḌa kuchh bhi nahin hota
kabhi dil men mire tere siva har baat hoti hai
kabhi dil men mire tere siva kuchh bhi nahin hota
vahi TuuTi hui kashti vahi pagal hava.en hain
hamare saath duniya men naya kuchh bhi nahin hota
ye sauda hai nigahon ka tijarat dil ki hai lekin
mohabbat men ḳhasara fa.eda kuchh bhi nahin hota
kabhi do chaar qadmon ka safar tai ho nahin paata
kabhi milon se lamba fasla kuchh bhi nahin hota
faqat kirdar ka maara hua hai har bashar varna
koi insan achchha ya bura kuchh bhi nahin hota
falak par hi sitaron ka koi unvan hota hai
kisi TuuTe sitare ka pata kuchh bhi nahin hota
bhale ḳhvahish karun teri kisi bhi shakl men lekin
mira maqsad parastish ke siva kuchh bhi nahin hota
agar dekhun to ḳhami hi dikha.i de har ik shai men
agar sochun to ḳhud se bad-numa kuchh bhi nahin hota
ba-zahir umr-bhar yuun to hazaron kaam karte hain
haqiqat men magar ham ne kiya kuchh bhi nahin hota
Leave a Reply