abhi to faisla baaqi hai shaam hone de
sahar ki oT men mahtab-e-jan ko rone de
tiri nazar ke ishare na raushni ban jaa.en
to phir ye raat kahan jugnuon ko sone de
bahut hua to havaon ke saath ro lunga
abhi to zid hai mujhe kashtiyan Dubone de
hamare ba.ad bhi kaam aa.egi junun ki aag
ye aag zinda hai is ko na sard hone de
sadi se mangegi agli sadi hisab-e-gunah
mire sarishk ko lamhon ke daagh dhone de
ye gham mira hai to phir ghair se ilaqa kya
mujhe hi apni tamanna ka baar Dhone de
babul sabz hai bandhe hisar-e-naz ‘ajmal’
mujhe bhi apni zamin men chinar bone de
Leave a Reply