mire azizo, mire rafiqo
miri communism se ho khaif
miri tamanna se dar rahe ho
magar mujhe kuchh gila nahin hai
tumhari ruhon ki sadgi se
tumhare dil ki sanam-gari se
mujhe ye mahsus ho raha hai
ki jaise begana hava bhi tak
tum apne andaz-e-dilbari se
ki jaise vaqif nahin abhi tak
sitamgaron ki sitamgari se
fareb ne jin ke aadmi ko
haqir o buzdil bana diya hai
haqiqaton ke muqable men
farar karna sikha daya hai
tumhen ye jis din pata chalega
hayat rang-e-hina nahin hai
hayat husn-e-butan nahin hai
ye ek khanjar-ba-kaf karishma
ek zahrila jam-e-mai hai
hamari piiri ho ya javani
malul o afsurda zindagani
shikasta-e-naghma shikasta-e-nai hai
tumhen ye jis din pata chalega
taassubat-e-kuhan ke parde
tumhari ankhon men jal-bujhenge
ye tum ne kaise samajh liya hai
ki dil mira ishq se hai khali
miri nazar husn se hai aari
qarib aao tumhen bataun
mujhe mohabbat hai aadmi se
mujhe mohabbat hai zindagi se
mujhe mohabbat hai mah-jabinon
se, gul-rukhon se saman-e-baron se
kitabon se, rotiyon se, phulon se
pattharon se, samundaron se
miri nigah men base hue hain
hazar andaz-e-dil-rubai
main apne siine ko chaak kar ke
agar tumhen apna dil dikhaun
to tum ko har zakhm ke chaman men
hazar sarv-e-ravan milenge
udaas maghmum vadiyon men
hazar-ha naghma-khvan milenge
hazar ariz, hazar shamen
hazar qamat, hazar ghazlen
subuk-kharaman ghazal jaise
hazar arman hazar umiden
falak pe taron ke jaal jaise
magar koi tode de raha hai
larazti mizhgan ke nashtaron ko
dilon ke andar utarta hai
koi siyasat ke khanjaron ko
kisi ke zahrile tez nakhun
uqaab ke panja-ha-e-khunin
ki tarah ankhon pe aa rahe hain
gulab se tan misal-e-bismil
zamin par tilmila rahe hain
jo pyaas paani ki muntazir thi
vo suliyon par tangi hui hai
vo bhuuk roti jo mangti thi
salib-e-zar par chadhi hui hai
ye zulm kaisa, sitam ye kya hai
main sochta huun ye kya junun hai
jahan men nan-e-javin ki qimat
kisi ki ismat, kisi ka khuun hai
tumhin batao mire azizo
mire rafiqo, tumhin batao
ye zindagi paara paara kyuun hai
hamari pyari hasin zamin par
ye qatl-gah ka nazara kyuun hai
mujhe batao ki aaj kaise
siyah barud ki lakiren
katile kajal, sajile surme
ke bankpan se ulajh gai hain
khizan ke kanton ki ungliyan kyuun
har ik chaman se ulajh gai hain
mujhe batao lahu ne kaise
hina ke jaadu ko dho diya hai
hayat ke pairahan ko insan
ke ansuon ne bhigo diya hai
bata sako to mujhe batao
ki saaz naghmon se kyuun hain ruthe
bata sako to mujhe batao
ki taar kyuun pad gae hain jhute
mire azizo, mare rafiqo
miri communism kuchh nahin hai
ye ahd-e-hazir ki aabru hai
miri communism kuchh nahin hai
ye ahd-e-hazir ki aabru hai
miri communism zindagi ko
hasin banane ki aarzu hai
ye ek maasum justuju hai
tumhare dil men bhi shayad aisi
koi javan-sal aarzu ho
koi ubalti hui surahi
koi mahakta hua subu ho
zara ye samjho mire azizo
mire rafiqo zara ye socho
tumhare qabze men kya nahin hai
tumhari thokar se jaag uthegi
tumhare qadmon men jo zamin hai
bas ek itni kami hai yaaro
ki zauq begana-e-yaqin hai
tumhari ankhon hi men hai sab kuchh
tumhari ankhon men sab jahan hai
tumhari palkon ke niche dharti
tumhari palkon par asman hai
tumhare hathon ki jumbihson men
hai ju-e-rang-e-bahar dekho
na dekho is be-sutun-e-gham ko
tum apne teshon ki dhaar dekho
tum apne teshe utha ke laao
main le ke apni kudal niklun
hazar-ha saal ke masaib
hazar-ha saal ke mazalim
jo ruuh o dil par pahad ban kar
hazar-ha saal se dhare hain
ham apne teshon ki zarb-e-kari
se un ke sinon ko chhed dalen
ye hai sirf ek shab ki mehnat
jo ahd kar len to ham sahar tak
hayat-e-nau ke nae ajanta
nae ellora tarash dalen
Leave a Reply