Jasad Ne Jaan Se Puchha Ki Qalb-E-Be-Riya Kya Hai

Sahir Dehlavi

jasad ne jaan se puchha ki qalb-e-be-riya kya hai

ḳhitab aaya ki a.ine men jauhar ke siva kya hai

ayaan a.ine men hai surat-e-ma.ani-safa kya hai

nihan taskin men hai iztirab-e-dil riya kya hai

miTana aap ko nabud ho jaana fana kya hai

samana aap men aur ḳhud ba-ḳhud hona baqa kya hai

do-alam jalva-gah-e-husn men ain-e-basirat men

ye aks-e-shaḳhs hai a.ine men surat-numa kya hai

vo yakta zaat hai ain-e-surur-e-ilm-o-haq ai dil

nihan kasrat men vahdat ho ga.i hai ma-siva kya hai

qidam hai zat-e-vahid haal hai mazi-o-mustaqbil

azal se ta abad ki ibtida kya intiha kya hai

miTa kar dil se pindar-e-ḳhudi insaf se dekho

ki be-zauq-e-tamanna hasti-e-bim-o-raja kya hai

na the aape men muusi varna un ka hausla kya tha

jo bol uThte ki aa parda se bahar dekhta kya hai

tajalli ban ga.i ‘sahir’ naqab-e-ru-e-jan-e-jan

ki didan hukm-e-na-didan hai yarab majra kya hai