Rahbar Jaunpuri
jab jab rafaqaton se guzarna paḌa mujhe
pur-ḳhar vadiyon men utarna paḌa mujhe
ahd-e-taghayyurat men jiine ke naam par
apni rivayaton se mukarna paḌa mujhe
dariya ke shor-o-shar se men ḳha.if na tha magar
sahil ke intishar se Darna paḌa mujhe
bachpan ke sab nuqush nigahon men phir ga.e
kuchh din jo apne gaanv Thaharna paḌa mujhe
ik lamha-e-hayat ki taz.in ke liye
sadiyon simaT simaT ke bikharna paḌa mujhe
us manzil-fareb se guzra huun main jahan
apna bhi e’tibar na karna paḌa mujhe
Leave a Reply