Basir Sultan Kazmi
dil laga lete hain ahl-e-dil vatan koi bhi ho
phuul ko khilne se matlab hai chaman koi bhi ho
surat-e-halat hi par baat karni hai agar
phir muḳhatab ho koi bhi anjuman koi bhi ho
hai vahi la-hasili dast-e-hunar ki muntazir
aḳhirash sar phoḌta hai kohkan koi bhi ho
sha.eri men aaj bhi milta hai ‘nasir’ ka nishan
DhunDte hain ham use bazm-e-suḳhan koi bhi ho
adaten aur hajaten ‘basir’ badalti hain kahan
raqs bin rahta nahin ta.us ban koi bhi ho
Leave a Reply