agar ho khauf-zada taqat-e-bayan kaisi
nava-e-haq na sunae to phir ziyan kaisi
uthao harf-e-sadaqat lahu ko garm karo
jo tiir phenk nahin sakti vo kaman kaisi
unhen ye fikr ki meri sada ko qaid karen
mujhe ye ranj ki itni khamoshiyan kaisi
hava ke rukh pe liye baitha huun charagh apna
mire khuda ne mujhe bakhsh di amaan kaisi
hava chale to use kaun rok sakta hai
utha rakhi hai ye divar darmiyan kaisi
agar ye mausam-e-gul hai to zard-ru kyuun hai
dil-o-nazar pe ye kaifiyyat-e-khizan kaisi
na taar taar qaba hai na daagh daagh badan
mujahidon ke saron se gai azaan kaisi
Leave a Reply