chhoD Kar Ghar-Bar Apna Hasrat-E-Didar Mein

chhoḌ kar ghar-bār apnā hasrat-e-dīdār meñ

ik tamāsha ban ke aa baiThā huuñ kū-e-yār meñ

dam nikal jā.egā hasrat se na dekh ai nāḳhudā

ab mirī qismat pe kashtī chhoḌ de mañjdhār meñ

dekh bhī aa baat kahne ke liye ho jā.egī

sirf gintī kī haiñ sāñseñ ab tire bīmār meñ

fasl-e-gul meñ kis qadar manhūs hai ronā mirā

maiñ ne jab naale kiye bijlī girī gulzār meñ

jal gayā merā nasheman ye to maiñ ne sun liyā

bāġhbāñ to ḳhairiyat se hai sabā gulzār meñ

Leave a Comment