Qamar Jalalvi
chhoḌ kar ghar-bar apna hasrat-e-didar men
ik tamasha ban ke aa baiTha huun ku-e-yar men
dam nikal ja.ega hasrat se na dekh ai naḳhuda
ab miri qismat pe kashti chhoḌ de manjdhar men
dekh bhi aa baat kahne ke liye ho ja.egi
sirf ginti ki hain sansen ab tire bimar men
fasl-e-gul men kis qadar manhus hai rona mira
main ne jab naale kiye bijli giri gulzar men
jal gaya mera nasheman ye to main ne sun liya
baghban to ḳhairiyat se hai saba gulzar men
Leave a Reply