Zamin Ki Kya Kahun Ki Sar Pe Aasman Bhi Nahin

Zafar Zaidi

zamin ki kya kahun ki sar pe asman bhi nahin

hamari qismat-e-vafa men imtihan bhi nahin

uḌe to kis tarah uḌe ye aaj ta.ir-e-nigah

hava bhi gard gard hai paron men jaan bhi nahin

sunun main us ki jhuuT baat aur hans ke chup rahun

ki mere munh men apne vaste zaban bhi nahin

qalam uThao aaj main lahu ka za.iqa likhun

ki ab mire yaqin men zara guman bhi nahin

yahi vo shaḳhs hai kabhi jo bastiyon ka zo.am tha

isi ki dastaras men ab koi makan bhi nahin

ye jism-o-jan ka qafila thakan se chur-chur hai

magar rah-e-hayat men to sa.eban bhi nahin

ubuur kar chuke tamam dasht dasht raste

magar hamare azm men zara takan bhi nahin

tumhari baat baat se bhare paḌe hain roz-o-shab

suna.en kya kisi ko mo’atabar bayan bhi nahin