Shan Bharti
dil mera faqat tere nishane ke liye hai
aur is ke siva jo hai zamane ke liye hai
hansne ke liye hai na hansane ke liye hai
ye anjuman-e-naz jalane ke liye hai
har shaḳhs ki ankhon men masa.il ke hain aansu
honTon pe hansi sirf dikhane ke liye hai
us ka kabhi musbat koi pahlu nahin nikla
jo tum se ta.alluq hai nibhane ke liye hai
jazbat ke sho.alon se na kha ḳhauf ki aḳhir
ye aag bhi to aag bujhane ke liye hai
ai ‘shan’ mujhe ḳhud nahin malum ki aḳhir
meri ye tag-o-dau kise paane ke liye hai
Leave a Reply