mahv kar di zehn se gham ne tiri tasvir bhi
donon dushman hain miri taqdir bhi tadbir bhi
muskurati hai miri ankhon men aansu dekh kar
kis qadar be-dard hai zalim tiri tasvir bhi
kis qadar nazuk hai ehsasat ka aalam ki ishq
ek hi nashsha hai lekin zahr bhi iksir bhi
in ke divanon ki saj-dhaj ko hiqarat se na dekh
ishq ka zevar hain nadan tauq bhi zanjir bhi
ai ‘dil’ us ki yaad hai goya usi ka aa.ina
muzda-e-jan-baḳhsh bhi chalti hui shamshir bhi
Leave a Reply