Sufi Tabassum
har ek naqsh tire paanv ka nishan sa hai
har ek rahguzar tera astan sa hai
kahin simaT ke na rah jaa.e himmat-e-parvaz
ki shaḳh shaḳh pe pinhan ik ashiyan sa hai
abhi gulon ki nazar se nazar nahin milti
abhi faza-e-chaman men dhuan dhuan sa hai
na jaane shauq ki vo raat kaT ga.i kaise
har ek lamha jahan umr-e-javedan sa hai
ujaḌ ga.i hai miri ka.enat-e-dil phir bhi
miri nigah men abad ik jahan sa hai
zaban pe naam bhi aata hai tera ruk ruk kar
har ek tar-e-nafas dil ka pasban sa hai
ye kis ne aaj jaga.i hai ahd-e-rafta ki yaad
ye kaun dal ke qarin aaj nauha-ḳhvan sa hai
lage hain dil se ubharne vafa ke afsane
ki apne haal pe phir koi mehrban sa hai
Leave a Reply