Shauq Qidvai
dil mira TuuTa to us ko kuchh malal aa hi gaya
apne bachpan ke khilaune ka ḳhayal aa hi gaya
hashr men mazlum sab chup rah ga.e munh dekh kar
aḳhir is zalim ke kaam us ka jamal aa hi gaya
hans ke bola jab phansa balon men ḳhun-aluda dil
jaal phailaya tha main ne us men laal aa hi gaya
chhup ke gar mah-e-siyam aata to mai kyuun chhuTti
kya karun main samne mere hilal aa hi gaya
dil tha us ka lekin ab ham mar ke denge huur ko
vo pasheman hai ki vaqt-e-intiqal aa hi gaya
kaanp uThe ghusse se vo sun kar miri fariyad ko
naghma aisa tha ki aḳhir un ko haal aa hi gaya
meri nazron se koi ai ‘shauq’ sikhe jazb-e-ishq
ban ke til ankhon men us ke ruḳh ka ḳhaal aa hi gaya
Leave a Reply