Syed Sarosh Asif
aql to kahti hai ab ke us se achchha DhunD luun
hai magar dil ki ye zid phir us ke jaisa DhunD luun
is se mere pyaas ki shiddat men aa.egi kami
men agar ḳhud se ziyada koi pyasa DhunD luun
ai ḳhuda jo ho tire donon jahanon se alag
tu ijazat de to koi aur duniya DhunD luun
ḳhud-kushi aur zindagi men se agar chunna paḌe
ain-mumkin hai main koi aur rasta DhunD luun
is se pahle ki mire khone ki ḳhabren aam huun
meri koshish hai ki main ḳhud ko dobara DhunD luun
aur kitni der hai aisa ki aane men abhi
kya main jab tak ke liye koi masiha DhunD luun
Leave a Reply