Hazaron Manzilen Phir Bhi Meri Manzil Hai Tu Hi Tu

hazaron manzilen phir bhi miri manzil hai tu hi tu

mohabbat ke safar ka akhiri hasil hai tu hi tu

bala se kitne hi tufan uthe bahr-e-mohabbat men

har ik dhadkan ye kahti hai mira sahil hai tu hi tu

mujhe maalum hai anjam kya hoga mohabbat ka

masiha tu hi tu hai aur mira qatil hai tu hi tu

kiya ifsha mohabbat ko miri bebak nazron ne

zamane ko khabar hai mujh se bas ghafil hai tu hi tu

tire bakhshe hue rangon se hai pur-nur har manzar

yaqinan bahr o bar ki ruuh men shamil hai tu hi tu

tujhi se guftugu har dam tiri hi justuju har dam

miri asaniyan tujh se miri mushkil hai tu hi tu

jidhar ja.un jidhar dekhun tire qisse tiri baten

sar-e-mahfil hai tu hi tu pas-e-mahmil hai tu hi tu

Leave a Comment