Poet
har samt zindagi ka tamasha bhi ḳhuub hai
duniya bhi ḳhuub raunaq-e-duniya bhi ḳhuub hai
jis shahr men kisi ko kisi ki ḳhabar nahin
us shahar-e-la-javab men jiina bhi ḳhuub hai
mai-ḳhana-e-hayat ka ahval kya likhun
saaqi bhi ḳhuub saghar-e-sahba bhi ḳhuub hai
pi kar sharab gum main rahun apne hosh men
ai zindagi ye tera taqaza bhi ḳhuub hai
dekha hai main ne us ke ziyan men bhi fa.eda
bazar-e-arzu ka ḳhasara bhi ḳhuub hai
hoti hai avvalin hi mulaqat-e-aḳhiri
insan ka ye maut se rishta bhi ḳhuub hai
muddat se chal raha huun magar tai na kar saka
‘shahid’ ye rah-e-rast-e-tamanna bhi ḳhuub hai
Leave a Reply