ishq karne ka irada ho to ham se milna
tum ko ḳhud se kabhi milna ho to ham se milna
qabil-e-did hain sab zaḳhm hamare dil ke
aap ko shauq-e-tamasha ho to ham se milna
saya-e-gul men mulaqat rahegi tum se
mausam-e-gul men jo tanha ho to ham se milna
be-sabab ham bhi kisi se nahin milte sahab
tum bhi milne ki tamanna ho to ham se milna
va.ada-e-vasl to lete nahin tum se lekin
ittifaqan idhar aana ho to ham se milna
apni ankhon ke liye ḳhvab kahan furqat men
ḳhvab tum ne koi dekha ho to ham se milna
apna dar sab pe khula hai koi apna ho ki ghair
kisi darvesh se milna ho to ham se milna
Leave a Reply