koī to sauġhāt us ke shahr kī ghar le chalo
kuchh nahīñ to jism par zaḳhmoñ kī chādar le chalo
pyaar ke bosīda phūloñ kī yahāñ qīmat nahīñ
shīsh-mahloñ se guzarnā hai to patthar le chalo
hoñge arbāb-e-tamāshā meñ kuchh ahl-e-dard bhī
chand aañsū bhī tabassum meñ chhupā kar le chalo
raat jab bhīgī to saa.e ne mujhe āvāz dī
maiñ hī tanhā.ī kā sāthī huuñ mujhe ghar le chalo
jaane kaise kaise sahrāoñ meñ ho apnā guzar
dosto āñkhoñ meñ ashkoñ kā samundar le chalo
dād-ḳhvāhī ko ye tanhā zaḳhm-e-sar kaafī nahīñ
munsifoñ ke paas patthar bhī uThā kar le chalo
der se sub.heñ khaḌī haiñ dar pe ā.īna-ba-dast
zindagī ko ab zarā ḳhvāboñ se bāhar le chalo
mujrim-e-haq shahr meñ mere sivā koī nahīñ
sang-andāzoñ kī bastī meñ mirā sar le chalo
raat us ke lams kī ḳhushbū ne chupke se kahā
yā yahīñ rah jaao tum bhī yā mujhe ghar le chalo
‘tāhir’ apne sar kisī kā ye bhī kyoñ ehsāñ rahe
apnī gardan ke liye ḳhud apnā ḳhanjar le chalo