kis shaḳhs ki talash men sar phoḌti rahi
sunsan jangalon men hava chiḳhti rahi
mathe pe dhuul haath men kanTe liye hayat
sahra se ḳhushbuon ka pata puchhti rahi
dil bujh gaya to raat ki surat thi zindagi
jab tak ye ik charagh raha raushni rahi
main aaj bhi na us se koi baat kar saka
lafzon ke pattharon men tamanna dabi rahi
sunsan raston pe bhaTakti thi chandni
shab bhar na jaane kis ke liye jagti rahi
vo peḌ jo hara tha baharon ke ba.ad bhi
hairat se us ko zard hava dekhti rahi
suraj na koi meri gali men utar saka
shab bhar mire makan ki khiḌki khuli rahi
Leave a Reply