Rafiq Raaz
chandni raat men ik baar use dekha tha
chand se bar-sar-e-paikar use dekha tha
misl-e-ḳhurshid numudar vo ab tak na hua
aḳhiri baar sar-e-ghar use dekha tha
main bhala kaise bayan karta sarapa us ka
shab-e-yalda pas-e-divar use dekha tha
dil men utri hi na thi raushni us manzar ki
avvalin baar to bekar use dekha tha
log kyuun koh o bayaban men use DhunDte hain
main ne to bar-sar-e-bazar use dekha tha
us ne kya raat ko dekha tha ye malum nahin
main ne to naqsh-ba-divar use dekha tha
us ki ankhon men chamak ḳhvab ki ye kaisi hai
raat bhar charḳh ne bedar use dekha tha
Leave a Reply