Sahir Siyalkoti
ḳhudaya ishq men achchhi ye shart-e-imtihan rakh di
laga kar mohr-e-ḳhamoshi mire munh men zaban rakh di
jo puchho dil se shai tum ne kahan ai mehrban rakh di
baḌi naḳhvat se kahte hain jahan chahi vahan rakh di
kisi ke jaur-e-behad par bhi jab ḳhamosh rahna tha
to phir kyuun ai ḳhuda tu ne mire munh men zaban rakh di
mohabbat ka nishan tak bhi zamane men nahin milta
uTha kar chiiz ye ai asman tu ne kahan rakh di
kahan tak hadsat-e-barq-o-baran se rahun ḳha.if
ḳhuda ka naam le kar main ne tarah-e-ashiyan rakh di
Leave a Reply