Shahzad Nayar
ik soch aa.i dil men tire intizar ki
aur apne-ap baḌh ga.i raftar car ki
ye majra hai shahr men avargi ka dost
so baat is men dasht ki aa.e na ḳhaar ki
vo camere se jhaT mire kamre men aa ga.i
us ḳhush-badan ne aaj bahut duur maar ki
dekhe baghair vasl ki manzil ko sar kiya
jismon ne ab sada ki ravish iḳhtiyar ki
ab tez rabton ki banin suraten hazar
surat bachi na ek tire intizar ki
aks-o-sada ne barq ki surat safar kiya
pal men ḳhabar mili hai samundar ke paar ki
satren samajh ke roz lakiren paḌha kiye
ham ne tiri hatheli kahani shumar ki
apni hi mauj mauj se pal pal muqabla
dariya ne naav kitni musibat se paar ki
Leave a Reply