Parveen Kaif
jab kabhi koi kaam yaad aaya
tab unhen mera naam yaad aaya
jab ye socha ki un se thi pahchan
duur hi ka salam yaad aaya
phir nasheman ki abtari dekhi
phir qafas ka nizam yaad aaya
phir vo shab vo sukut ka aalam
phir ḳhuda ka kalam yaad aaya
aaj unhen dekh kar mohabbat ka
qissa-e-na-tamam yaad aaya
haa.e maazi ke ḳhairiyat naame
jaane kis kis ka naam yaad aaya
ban men dekha jo vahshiyon ka hujum
shahar ka izhdiham yaad aaya
Leave a Reply