meri ḳhizan to sabz hui is ḳhumar men
aane ka us ne va.ada kiya hai bahar men
rakkhi hui hai laaj miri mere ishq ne
varna to kya rakha hua hai intizar men
ghar bhi mujhe to dasht sa lagta hai tere bin
lagta nahin hai dil mira ujḌe dayar men
ab jo suluk tu kare ye zarf hai tira
main aa ga.i huun aaj tire iḳhtiyar men
raushan na ho saki kabhi ye sham-e-gham miri
main ne jala.e diip ka.i e’tibar men
meri vafa ke zikr pe us ki vo ḳhamushi
saare javab mil ga.e is iḳhtisar men
dekhi to hogi raah miri us ne bhi kabhi
aaya bhi hoga ashk mire chashm-e-yar men
dekha hai main ne mo.ajiza ‘dilshad’ aisa bhi
hansne se us ke gul khile hain kunj-e-ḳhar men
Leave a Reply