Poet
ishq men tere jan-e-zar haif hai muft men chali
tu ne par o sitam-shi.ar ab bhi miri ḳhabar na li
koi bala phir aa.egi muft men jaan ja.egi
pech men ham ko la.egi zulf-e-siyah baḌh chali
aate hi fasl-e-dil-pazir bole qafas men ham-safir
jis men hue the ham asiir lo vahi phir hava chali
ai gul-e-gulshan-e-vafa be-tire niind aa.e kya
bistar-e-ḳhar se siva mujh ko hai farsh-e-maḳhmali
ḳhvahish-e-justaju-e-yar had se bhi kuchh thi be-shumar
ba.ad-e-fana mira ghubar DhunDh phira gali gali
danish-o-taqat-o-basar baḌh ga.e saare ham-safar
zad-e-safar ki fikr kar lag rahi hai chala-chali
laao pyala-e-sharab ghir ke phir aaya hai sahab
ab nahin mere dil ko taab bad-e-bahar phir chali
ai mah-e-asman-jah tujh sa nahin hai kaj-kulah
le ke falak charagh-e-mah DhunDh phira gali gali
mu-e-safed aa gaya dhabba ḳhizab ka laga
fasl-e-shaba-e-be-vafa dagh-e-firaq de chali
kabk ka dil hua figar mor ne jaan ki nisar
tegh-e-ḳhiram-e-naz-e-yar chaal na.i na.i chali
bhuul ke koi dosto chahe na un hasinon ko
ab ye DhinDhora pher do lucknow men gali gali
go thi ik aag mushta.il ji tha par aisa muzmahil
sham-e-lahad bhi misl-e-dil gaah bujhi kabhi jali
kahta hai shoḳh-e-tund-ḳhu taab nahin dimagh ko
ba.is-e-dard-e-sar na ho bu-e-libas-e-sandali
sog men apne zaar ke yar-e-vafa-shi.ar ke
mehndi chhui na haath se missi na muddaton mali
hijr ki shab thi kya ghazab had ke sahe gham-o-ta.ab
sub.h-e-visal aa.i ab jaan bachi bala Tali
koi nasim-e-sub.h se meri taraf se ye kahe
bagh-e-murad ki mire khil na saki koi kali
kya tire haath aa gaya kab ka tujhe ghubar tha
ku-e-sanam se kyuun saba ḳhaak miri uḌa chali
dil hai bas ab alam se shaq yaas se rang ruḳh hai faq
dekhenge ham kab ai ‘qalaq’ ankhon se marqad-e-ali
Leave a Reply