aaj ik lahr bhi paani men na thi
koi tasvir ravani men na thi
valvala misra-e-avval men na tha
harakat misra-e-sani men na thi
koi ahang na alfaz men tha
kaifiyat koi ma.ani men na thi
ḳhuun ka nam sada-nava.i men na tha
ḳhuun ki bu shoḳh-bayani men na thi
koi mafhum tasavvur men na tha
koi bhi baat kahani men na thi
rang ab koi ḳhalaon men na tha
koi pahchan nishani men na thi
ḳhush-yaqini men na tha ab koi nuur
zau koi ḳhanda-gumani men na thi
ji sulagne ka dhuan ḳhat men na tha
raushni harf-e-zabani men na thi
ranj bhule hue va.ade ka na tha
lazzat ab yad-dahani men na thi
lo ki jamid si ghazal bhi likh di
aaj kuchh zindagi ‘bani’ men na thi
Leave a Reply