chhup ke ghar ghair ke jaaya na karo
rabt har ik se baḌhaya na karo
ai buto baal banaya na karo
saanp hathon pe khelaya na karo
sabza-e-ḳhat ko dikhaya na karo
tote hathon ke uḌaya na karo
rind gham hijr ka khaya na karo
jaan ko apni khapaya na karo
tazkira ghair ka laaya na karo
jale ko aur jalaya na karo
munh ko ghunche ke chiḌaya na karo
gul ko khilli men uḌaya na karo
mudda.a jo ho zaban se kaho saaf
harf-e-matlab ko chabaya na karo
apna samjho mira dil shauq se lo
meri jaan apna paraya na karo
mujh ko bhi yaad hain fiqre sahib
joḌ bande pe banaya na karo
ḳhud main dam-baz huun hai dhyan kidhar
mujh ko fiqron men uḌaya na karo
hosh men aao pari-zado tum
mujh ko divana banaya na karo
ham lahu thuuk ke mar ja.enge
laali honTon pe jamaya na karo
log sauda.i hue jaate hain
dhaḌi missi ki lagaya na karo
ho na angusht-numa misl-e-hilal
jaan nauchandi men jaaya na karo
ai buto apne ḳhuda ko maano
ka.aba-e-dil ko to Dhaya na karo
main to hazir huun vafadari men
tum karo mujh se vafa ya na karo
dhoke dariya men bhabuka se haath
aag paani men lagaya na karo
mujh se ḳhalvat ki mulaqat rahe
roz jalvat men bulaya na karo
vaste bande ke bad-nami hai
jaan sohbat men biThaya na karo
dekhne valon ki janib dekho
is tarah aankh churaya na karo
sharm beja hai bura karte ho
achchhi surat ko chhupaya na karo
jaao dariya pe na tum ghair ke saath
aise menDhe to laḌaya na karo
daant piisa na karo ashiq par
jaan yuun honTh chabaya na karo
chaar din vasl men hans lene do
aaTh aaTh aansu rulaya na karo
log bad-vaza.a kahenge tum ko
mele-Thele kabhi jaaya na karo
jaan kis kaam ka ye bhola-pan
dam men har ek ke aaya na karo
ashiqon ki buri gat hoti hai
tum sitari to bajaya na karo
hazrat-e-dil yahi farmate hain
ishq-e-ma.ashuq chhupaya na karo
ḳhush nahin aata agar mera kalam
to ghazal bhi miri gaaya na karo
thamo ab qabza-e-shamshir ai ‘rind’
koft par koft uThaya na karo
Leave a Reply