sar-e-rah ik hadisa ho gaya
achanak tira samna ho gaya
ḳhud apni bhi ab yaad aati nahin
tiri yaad ka haq ada ho gaya
masiha.iyan dekhti rah ga.iin
tira dard baḌh kar dava ho gaya
kaTegi kis ummid par zindagi
agar tera gham bhi juda ho gaya
qarib aa ga.iin ḳhud-baḳhud manzilen
tira naqsh-e-pa rahnuma ho gaya
unhen dekh kar dekhti rah ga.iin
ḳhuda jaane ankhon ko kya ho gaya
‘rishi’ zindagi zindagi ban ga.i
dil apna alam-ashna ho gaya
Leave a Reply