Sultan Rashk
ajab insan huun ḳhush-fahmiyon ke ghar men rahta huun
main jis manzar men huun gum us ke pas-manzar men rahta huun
jo main zahir men huun ye to sarab-e-zat hai yaaro
main apne zehn ke but-ḳhana-e-azar men rahta huun
jo mujh se meri hasti le gaya tha ek saa.at men
baḌi muddat se main us shaḳhs ke paikar men rahta huun
koi manus chaap aa.e suragh-e-agahi le kar
main apni ḳhvahishon ke ḳhana-e-be-dar men rahta huun
alamat fikr-o-danish ki jahan patthar hi patthar hon
miri himmat ki us ahd-e-sitam-parvar men rahta huun
main kya huun kaun huun maqsad miri taḳhliq ka kya hai
na jaane kitni sadiyon se isi chakkar men rahta huun
Leave a Reply