ijz-e-ahl-e-sitam ki baat karo
ishq ke dam-qadam ki baat karo
bazm-e-ahl-e-tarab ko sharmao
bazm-e-ashab-e-gham ki baat karo
bazm-e-sarvat ke khush-nashinon se
azmat-e-chashm-e-nam ki baat karo
hai vahi baat yuun bhi aur yuun bhi
tum sitam ya karam ki baat karo
khair hain ahl-e-dair jaise hain
aap ahl-e-haram ki baat karo
hijr ki shab to kat hi jaegi
roz-e-vasl-e-sanam ki baat karo
jaan jaenge janne vaale
‘faiz’ farhad o jam ki baat karo
Leave a Reply