Athar Shakeel
dasht ki avargi ho chak-damani bhi ho
ishq hai dil men to vahshat ki faravani bhi ho
rahat-e-qalb-o-nazar tum ho tashaffi bhi tumhi
aur tum mere liye vaj.h-e-pareshani bhi ho
sukhi ankhon se taka karte hain su-e-asman
girya karne ko hamari ankhon men paani bhi ho
kam se kam ye phone hi ka silsila baaqi rahe
hijr mushkil hai magar kuchh is men asani bhi ho
kaisi kaisi ḳhvahishen is dil men paati hain vajud
ho angeThi tum bhi ho aur raat barfani bhi ho
dil dua-go hai ‘shakil-at.har’ ki is ki tab.a men
hoshiyari hi nahin thoḌi si nadani bhi ho
Leave a Reply