avval to ye dhaj aur ye raftar ghazab hai
tis pe tire pazeb ki jhankar ghazab hai
kyunkar na tujhe daud ke chhati se laga luun
phulon ka gale men tire ye haar ghazab hai
jab dekhun huun karti hai mire dil ko pareshan
ashuftagi-e-turra-e-tarrar ghazab hai
ai kaash ye ankhen mujhe ye din na dikhatin
is shauq pe mahrumi-e-didar ghazab hai
khurshid ka munh hai ki taraf ho sake us se
yaani vo bar-afrokhta rukhsar ghazab hai
main aur kisi baat ka shaki nahin tujh se
ye vaqt ke uupar tira inkar ghazab hai
ab tak haram-e-vasl se mahram na hue ham
kaabe men hijab-e-dar-o-divar ghazab hai
gar ek ghazab ho to koi us ko uthave
raftar ghazab hai tiri guftar ghazab hai
farhad bacha ishq se ne qais na vamiq
ji le hi ke jaata hai ye azar ghazab hai
ai ‘mushafi’ is shauq se tuk bach ke tu chalna
sunta hai miyan vo but-e-khun-khar ghazab hai