Ab Guman Hai Na Yaqin Kuchh Bhi Nahin Kuchh Bhi Nahin

Amardeep Singh

ab guman hai na yaqin kuchh bhi nahin kuchh bhi nahin

asman kuchh bhi nahin aur zamin kuchh bhi nahin

miT gaya dil se aqidat ka bharam ya.ani ab

us ka dar kuchh bhi nahin apni jabin kuchh bhi nahin

kyon na yak-rangi-e-halat se ji ukta.e

ab koi bazm-e-tarab daur-e-hazin kuchh bhi nahin

ab to har husn-o-nazar rang-o-mahak saz-o-suḳhan

laakh achchhe hon magar ḳhud se hasin kuchh bhi nahin

jaane kis taur hai taqsim-e-karam allah ka

hai kahin kitna hi kuchh aur kahin kuchh bhi nahin

aas bandhti hai zara der use takne men

kaun kahta hai sar-e-arsh-e-barin kuchh bhi nahin

aa hi ja.enge tah-e-dam-e-ajal sab ik din

ho bhale taḳht-nashin ḳhak-nashin kuchh bhi nahin

kitna pur-shor tha anfas ka bahta dariya

kyon ye kahta hai dam-e-baz-pasin kuchh bhi nahin

miT gaya jism hui ruuh bhi ruḳhsat kab ki

ab yahan koi makan hai na makin kuchh bhi nahin

ḳhud se kis taur sahe shaḳhs vo duuri apni

hai ba-juz apne ‘amar’ jis ke qarin kuchh bhi nahin