Aurang Zeb
aam raste se haT ke aaya huun
saari duniya se kaT ke aaya huun
meri vus.at tujhe Dara deti
apne andar simaT ke aaya huun
koi taaza sitam ki main pichhle
hadson se nimaT ke aaya huun
haan mohabbat to maar deti hai
ye kahani main raT ke aaya huun
meri halat se maap raste ko
main kahan se palaT ke aaya huun
rah-e-gham ab Dara nahin sakti
gham se hi to lipaT ke aaya huun
us ki shaḳhon pe phal nahin lagta
jis shajar se main kaT ke aaya huun
koi surat nahin hai juḌne ki
itne TukḌon men baT ke aaya huun
Leave a Reply