Hatim Ali Mehr
kaaba-o-but-khana valon se juda baithe hain ham
ik but-e-na-ashna se dil laga baithe hain ham
aap se apne ko divana bana baithe hain ham
ku-e-janan chhod ke jangal men aa baithe hain ham
kyuun mukaddar kar diya nazuk-mizajon ka mizaj
kucha-e-janan se chal ja ai saba baithe hain ham
ye dua kaaba men karte hain ki us but se mila
tere darvaza par aa kar ai khuda baithe hain ham
vo to kahte hain ki uth jaaen mere kucha se aap
haae kitni ho gai hain be-haya baithe hain ham
sargirani hai abas ham khaksaron se tumhen
ya to mitne ko basan-e-naqsh-e-pa baithe hain ham
apna batin khuub hai zahir se bhi ai jan-e-jan
aankh ke ladne se pahle ji lada baithe hain ham
main to kahta huun ki bazm-e-ghair hai yaan se utho
aur vo kahte hain mujh se tujh ko kya baithe hain ham
ya hamen uthva diya ya uth gae hain aap vo
gar kabhi majlis men bhi paas un ke ja baithe hain ham
bazm-e-tasvir apni sohbat ho gai hai in dinon
ashna din men bhi ab na-ashna baithe hain ham
pad gaya hai haath jab angiya pe us khush-gat ki
surat-e-shahbaz chidiya ko daba baithe hain ham
guhar se uthne ki nahin bahar nahin rakhne ke paaon
yaar ke sar ki qasam ai ‘mehr’ kha baithe hain ham
Leave a Reply