haal maazi ka silsila kaaTe
vaqt ki vaqt har sada kaaTe
lamha lamhe ka yuun gala kaaTe
saanp ko jaise nevla kaaTe
gaanv ka shahar silsila kaaTe
mehr-o-iḳhlas ka gala kaaTe
is tarah kaTti kahan talvar
jis tarah ḳhanjar-e-ana kaaTe
ziist ki tang koThari aur main
jaise mujrim koi saza kaaTe
kis ta.alluq ki hai saza aḳhir
ḳhud mujhe aaj ghar mira kaaTe
hai koi jyotishi kahin aisa
jo hatheli pe bhi likha kaaTe
Leave a Reply