Ahmad Ashfaq
ab kisi khvab ki taabir nahin chahta main
koi surat pas-e-tasvir nahin chahta main
chahta huun ki rifaqat ka bharam rah jaae
ahd-o-paiman ki tafsir nahin chahta men
hukm sadir hai to nafiz bhi karo mere huzur
faisle men koi takhir nahin chahta main
chahta huun tujhe guftar se qaail kar luun
baat men lahja-e-shamshir nahin chahta main
muddaa hai ki mira haq mujhe vapas mil jaae
tere ajdad ki jagir nahin chahta main
Leave a Reply