dost ban kar bhi kahin ghaat laga sakti hai
maut ka kya hai kisi ruup men aa sakti hai
in makanon men ye dhaḌka sa laga rahta hai
agli barish dar-o-divar gira sakti hai
tera din ho ki miri raat nahin ruk sakte
apne mehvar pe zamin ḳhud ko ghuma sakti hai
aisi tartib se raushan hain tiri mahfil men
ek hi phunk charaghon ko bujha sakti hai
mera fan mere ḳhad-o-ḳhal pe taqsim hua
meri biini miri tasvir bana sakti hai
fitratan us ki mahak charon taraf phailegi
phuul se mauj-e-saba shart laga sakti hai
ḳhush na ho itna ki yuun raushaniyan phuuT paḌen
is chaka-chaund men bina.i bhi ja sakti hai
gudgudahaT men ‘nasim’ us ne nahin socha tha
ye hansi TuuT ke bachche ko rula sakti hai
Leave a Reply