Kabhi Hum Mein Tum Mein Bhi Pyar Tha Tumhein Yaad Ho Ki Na Yaad Ho

Arsh Malsiyani

kabhi ham men tum men bhi pyaar tha tumhen yaad ho ki na yaad ho

na kisi ke dil men ghubar tha tumhen yaad ho ki na yaad ho

ye chali hai kaisi hava ki ab nahin khilte phuul milap ke

kabhi daur-e-fasl-e-bahar tha tumhen yaad ho ki na yaad ho

thiin baham nashat ki mahfilen thiin qadam men lutf ki manzilen

baḌa zindagi pe nikhar tha tumhen yaad ho ki na yaad ho

thi har ek baat men chashni haq-o-sidq-o-lutf-o-ḳhulus ki

rah-e-haq pe chalna shi.ar tha tumhen yaad ho ki na yaad ho

hue laḌ ke ham se agar juda rakhi aur mulk ki ik bana

ye tumhin ka shauq-e-farar tha tumhen yaad ho ki na yaad ho

hui jang-o-harab ki ibtida to batao bas yahi ik pata

koi tum men nang-e-vaqar tha tumhen yaad ho ki na yaad ho