kufr men bhi ham rahe qismat se iman ki taraf
shukr hai kaaba bhi nikla ku-e-janan ki taraf
kuchh asiran-e-qafas ke bakht hi bargashta hain
bu-e-gul phir phir gai ulti gulistan ki taraf
dekhte mar kar kisi par lutf-e-umr-e-javidan
kyuun gae khizr o sikandar ab-e-haivan ki taraf
dekhiye kya gul khilae fasl-e-gul aati to hai
haath abhi se daudte hain jaib o daman ki taraf
rashk kahta hai ki ponchhe honge us se ashk-e-ghair
haath uth kar rah gaya sau baar daman ki taraf
Leave a Reply