shaḳh-dar-shaḳh agar dhuup ke pahre honge
kisi patte ke kahan ḳhvab sunahre honge
jab kabhi dard ki chiḳhon se faza gunjegi
shahr ki bhiiḌ men ham log bhi bahre honge
ik bhayanak si faza aap ne dekhi hogi
ajnabi shahr men jab raat ko Thahre honge
vaqt saa.e ki tarah mere ta.aqub men hai
main jahan ja.unga afat ke pahre honge
hai ajab lazzat-e-tasir hava men shamil
zaḳhm phulon ke abhi aur bhi gahre honge
khol hi degi zaban phuul ki patti ‘atish’
champa.i dhuup se jab peḌ sunahre honge
Leave a Reply