Khalid Malik Sahil
ek talvar hai talvar bhi do dhari hai
zindagi phuul hai patthar se magar bhari hai
ek aadat si hai bezar tabi.at rahna
varna us vaqt kahan koi bhi be-zari hai
sarfaroshi ka maza hai na ḳhata-poshi ka
dushman-e-jan bhi jazbat se ab aari hai
aao sansar ki qimat men laga.en boli
log kahte hain ki insan men nadari hai
jaane kis soch ke lamhe ne chhua hai tujh ko
ik ajab kaif miri ruuh pe bhi taari hai
tishna tishna se badan men hai sharabi nashsha
chashma-e-faiz tiri aankh se phir jaari hai
Leave a Reply