Kahan Talak Kahun Saqi Ki La Sharab To De

kahan talak kahun saaqi ki la sharab to de

na de sharab Dubo kar koi kabab to de

bujhega soz-e-dil ai girya pal men aab to de

digar hai aag men duniya yuun hi azaab to de

guzarne gar ye mire sar se itna aab to de

ki sar pe charkh bhi dikhlai juun habab to de

hazaron tishna jigar kis se hoenge sairab

khuda ke vaste tegh-e-sitam ko aab to de

tumhare matla-e-abru pe ye kahe hai khaal

ki aisa nuqta koi vaqt-e-intikhab to de

dar-e-qubul hai darban na band kar dar-e-yar

dua-e-khair miri hone mustajab to de

khule hai naaz se gulshan men ghuncha-e-nargis

zara dikha to use chashm-e-nim-khvab to de

bala se aap na aaen pe aadmi un ka

tasalli aa ke mujhe vaqt-e-iztirab to de

hua bagule men hai kushtagan-e-zulf ki khaak

ki bad-e-marg bhi malum pech-o-tab to de

bala se kam na ho girye se mera soz-e-jigar

bujha par un ki zara atash-e-itab to de

shahid kijiyo qatil abhi na kar jaldi

thaharne mujh ko tah-e-tegh-e-iztirab to de

shikar-e-basta-e-fitrak ko tire maqdur

hua na ye bhi ki bosa sar-e-rikab to de

dil-e-birishta ko mere na chhodo mai-khvaro

jo lazzat us men hai aisa maza kabab to de

nashe men hosh kise jo gine hisab kare

jo tujh ko dena hain bose bila hisab to de

javab-e-nama nahin gar to rakh do nama-e-yar

jo puchhen qabr men ashiq se kuchh javab to de

rakhe hai hausla dariya kab ahl-e-himmat ka

nahin ye itna ki bhar kasa-e-habab to de

kahan bujhi hai tah-e-khak meri atish-e-dil

kaho hava se hila daman-e-sahab to de

khunuk dilon ki agar ah-e-sard dozakh men

pade to vaqai ik baar aag daab to de

karega qatl vo ai ‘zauq’ tujh ko surme se

nigah ki tegh ko hone siyah-tab to de

pahunch rahunga sar-e-manzil-e-fana ai ‘zauq’

misal-e-naqsh-e-qadam karne pa-turab to de

Leave a Comment