Mazhar Husain Sayed
ishq men qafila-e-salar nahin chahiye hai
ye to divar hai divar nahin chahiye hai
ye to sunti hai faqat dirham-o-dinar ki baat
ye hai duniya ise kirdar nahin chahiye hai
kah diya hai ki mohabbat ki zarurat hai so hai
ham ko is baab men takrar nahin chahiye hai
ham to apne hi kisi dhyan men baiThe hue hain
khinch lo saya-e-divar nahin chahiye hai
mujh se mat itne takalluf se mila kar ‘maz.har’
chahiye yaar adakar nahin chahiye hai
Leave a Reply